Aldrei framar mun verða bloggað á þessari síðu.
Ég vil þakka þeim sem lásu,
góðar stundir.

Ég blogga nú í Kommúnu. Kíkið á það.

Mesta rugl sem ég hef heyrt lengi ómaði í eyrum mínum þegar ég og Jórunn vorum á leiðinni í áðurnefnda sundferð um daginn. Það var ekki Jórunn sem stóð fyrir því, heldur var ég með kveikt á útvarpinu á meðan ég keyrði og var að hlusta á Kastljósþáttinn þar sem Eiríkur Jónsson slúðurberi Hér og Nú og Helga Vala á Talstöðinni áttust við í umræðu um hvað má setja í blöðin og hvað ekki. Eiríkur Jónsson verður þess heiður aðnjótandi að vera héðan í frá titlaður "mesta fífl sem ég hef bloggað um síðan ég missti mig yfir formanni frjálshyggjufélagsins sem vill leyfa vændi, fyrir réttu ári", ef einhver man eftir reiðibloggum síðan þá. Eiríkur gerði sitt allra allra besta til að tala alltaf ofaní Helgu þegar hún var að setja fram rök sín, og svo dirfist hann að kalla hana dóna og hræsnara þegar hún benti honum kurteisislega á staðreyndirnar - að hann væri að bulla! Það hefði mátt halda að hann væri að lesa upp úr klisjuorðabók eftir Hannes Hólmstein, það kom nákvæmlega ekkert almennilegt út úr kallræflinum.
Ég ætla ekki að taka upp hanskan fyrir Bubba, hann er eins og réttilega hefur verið bent á, búinn að selja þjóðinni sjálfan sig fyrir löngu. En börnin hans eiga ekki að þurfa að þola þetta. Aðgát skal höfð í nærveru sálar. Ég er afar hress með ákvörðun Iceland Express að selja ekki svona mannskemmandi óþverra. Ég vil einnig sérstaklega benda á bakþanka Jóns Gnarrs um slúður í fréttablaðinu í dag. Frábær pistill.

Einhvers staðar verður að draga mörkin á milli friðhelgi einkalífsins og fréttamennsku á Íslandi. Ég legg til að það verði gert nokkrum kílómetrum fyrir aftan þann stað sem við erum stödd á nú.

Steinunn gengur inn i herbergi litlu systur sinnar og glápir á plakat af ískyggilega lítið klæddri BRATZ-dúkku. Hún horfir á níu ára gamla systur sína og reynir að gubba út úr sér einhverju gáfulegu til að koma fram boðskapi sínum:

Ég hef yfirgefið Sódómu og haldið á heimaslóðir. Helgin var áhugaverð, skemtileg og ógnvekjandi. En aðallega full af væntumþykju og vináttu ásamt slatta af rigningu.
Gist var á Njálsgötunni hjá Helgu báðar næturnar (þó mér tækist að sofna á tveimur öðrum stöðum. Hvernig, skulum við ekki fara nánar útí). Hins vegar var byrjað á því að fara í Kringluna og sleppa sér í tónlistarinnkaupum. Keypti mér nýjustu diskana með Gorillaz og Coldplay, Demon Days og X&Y, Rearviewmirror (greatest hits 1991-2003) með Pearl Jam og Original Cast Recording - The Phantom of the Opera. Keypti líka Francis the mute með The Mars Volta fyrir Sindra, með það fyrir augum að stela disknum af honum oft og mörgum sinnum. Ég gerði einnig heiðarlega tilraun til að kaupa mér buxur. Komst í framhaldi að því að ég er afbrigðileg, þar sem ég vil ekki ganga í buxum sem hylja ekki einu sinni skapahárin, og það virðast ekki vera til öðruvísi buxur í fataverslunum Reykjavíkur. Keypti mér í staðinn einn bol.
Á laugardaginn labbaði ég upp og niður Laugarveginn í úrhellisrigningu og lopapeysu. Hún varð blaut og hárið á mér fallega liðað, sem sagt dökkar hliðar og bjartar hliðar. Keypti mér peysu í Nonnabúð, húfu í rauðakross-búðinni, Ok Computer með Radiohead í 12 tónum og buxnaleitin mikla endaði á eina rétta staðnum... í vinnufatabúðinni. Já já, ég er bóndi. En ég hyl þó alla vega á mér rassgatið!
Svo var heilsað upp á Frey, Auði og Freyju Sigrúnu. Freyja varð fyrst ekkert sátt við að vera trufluð svona dónalega í miðri mjólkurgjöf, en hrestist fljótt. Hún gubbaði á mömmu/ömmu sína en var hin ánægðasta hjá mér. Feis, haha :)
Á föstudagskvöldinu var haldið villt þriggja manna partí á Njálsgötunni. Svipað var upp á teningnum á laugardagskvöldinu, nema að ég var edrú, við bættist félagsskapur Erlu og gleðskapurinn barst út á stræti borgarinnar þar sem dyraverðir miðborgarinnar reyndust mér vel. Af þeim þremur skemmtistöðum sem ég prófaði, þá vinnur Kaffibarinn fyrir að vera flottur staður. Prikið er ágætt, en Grand rokk er sveittur og furðulegur staður. Helga hitti samt Eirík Hauks þar og heilsaði honum eins og þau væru aldavinir. Þau eru bæði nett. Reyndar var ég ekki lengi í bænum sökum þreytu. Tek þetta allt saman með trompi næst.

Þessar flottu myndir tók Nína í gærkvöldi, vona að hún myrði mig ekki svefni þó ég birti þær hér. Vil nota tækifærið og þakka henni og Helgu fyrir helgina.
Meira síðar. Góða nótt.

Í fréttum 16. júní: Breska lögreglan óttast að börnum frá Afríku sé smyglað til landsins til þess að fórna þeim við trúarlegar athafnir. Fyrr í þessum mánuði voru 2 afrískar konur dæmdar fyrir að pynta átta ára gamalt munaðarlaust barn frá Angóla og hafa ætlað að henda henni í sjóinn, þar sem þær trúðu því að barnið væri haldið illum anda. Breska löggan hefur ennfremur enn ekki borið kennsl á lík drengs sem fannst fyrir fjórum árum höfuðlaust á reki í ánni Thames, talið er að hann hafi verið myrtur í tengslum við trúarlegar athafnir.

Í fréttum í fyrradag: Heittrúarmenn mótmæltu ákaft á meðan Massouma al-Mubarak sór embættiseið til þingsetu sem fyrsta konan til að setjast á þing í Kúveit... aðeins nokkrum vikum eftir að konur í landinu öðluðust kosningarétt.

Í fréttum í gær: hálf milljón mótmælti auknum réttindum samkynhneigðra á Spáni. Fremstir í flokki voru rómversk-kaþólskir prestar og biskupar.

Í fréttum í dag: Rúmensk nunna lést eftir að hún hafði verið bundin við kross, handklæði troðið upp í munninn á henni og hún skilin eftir í þrjá daga í köldu herbergi í nunnuklaustri. Hún fékk ekki vatn né mat allan tímann. Hún þjáðist víst af geðklofa, en prestur og nokkrar nunnur bundu hana við krossinn til að reka út þann illa anda sem þau voru viss um að hún væri haldin.

Það sem mun væntanlega gerast á morgunn:
Þúsundir manna munu deyja eða þjást af trúarlegum ástæðum. Konur munu verða umskornar, börnum misþyrmt, nokkrir munu ákveða að sprengja sig og aðra upp í loft, samkynhneigðir munu afneita sjálfum sér, fólk mun verða kúgað og meitt, því nauðgað og það drepið.

Ég er alltaf að átta mig betur og betur á því...

hvað trúarbrögð eru rosalega slæm hugmynd.

E.S. Lagið: Son et Lumiere með The Mars Volta

E.E.S. Bókin: Heimsljós eftir Halldór Laxness

E.E.S. Gaman: Stefnan tekin á Reykjavík city á föstudaginn.

Góða nótt.

Það er komin ný lína í vinnuklæðnaði í KS Varmahlíð. Síðkjólalínan - alla vega fyrir þá sem heita Steinunn og eru síðust til að ná sér í föt. Hinir fá boli í þokkalega eðlilegri stærð. En vinnufötin mín eru sem sagt svo stór að ég gæti komið öllum íbúum Lundar fyrir í þeim með mér sjálfri. Og rauð. Einmitt minn litur. Nei.

Var að fylgjast með stórskemmtilegri dagskrá á Grímuverðlaununum í sjónvarpinu. Ég afrekaði það að sjá bæði sýningu ársins og sýningu ársinns skv. símakosningunni, Draumleik og Óliver! Datt í hug svona meðan ég horfði á verðlaunaafhendinguna, að ég var ekkert spennt fyrir Draumleik áður en ég skellti mér. Var bara stödd fyrir sunnan og mér finnst ómögulegt að eyða tíma mínum í borg óttans ekki í leikhúsferð, þar sem ég er forfallin leikhúsrotta. Þetta var eiginlega það eina sem í boði var svo ég dreif mig á sýninguna og fékk svo miklu meira heldur en ég hafði búist við.

Afmælin eru endalaus. Endalaus segi ég! Afmælisbarn dagsins í dag er Lína Rut, öðru nafni Sinnep. Óska ég henni gæfu og velfarnaðar um alla framtíð. Kyssikyss...

Ég held að ég hafi aldrei gert þetta áður... það er að segja að opna mér bjór á mánudagskvöldi, án nokkurs tilefnis, og drekka hann alein. Held ég stefni með hraðbyr í ræsið.
Svo vona ég að ykkar sumarvinnur séu æðislegar, þar sem mín SÖKKAR og er að drepa allar mannlegar tilfinningar inní mér. Eftir 7 tíma með bilaðri ísvél, óhreinni sjeikvél og manneskju sem lætur mér af og til finnast ég ekki þess verð að vera til, er full ástæða til að drekkja sorgum sínum, éta nammi, horfa á vídjó langt fram á nótt og vorkenna sjálfum sér. Enda er það það sem ég ætla að gera, alein og fjarri siðmenningu, vinum, kærasta og almennilegu fólki. Ég vildi óska að ég væri í annarri vinnu. Ég vildi óska að ég væri á Akureyri. Andskotinn.